Հայաստանում տեղի ունենալիք խորհրդարանական ընտրություններին մասնակցելու հարցում արցախահայերի վերաբերյալ հարցումներին պատասխանելով՝ ես, Հակոբ Հակոբյանը, «Արդարություն» կուսակցության համահիմնադիրը, հայտարարում եմ, որ արցախահայերը ակտիվորեն կմասնակցեն ընտրություններին՝ ցանկանալով տեսնել այնպիսի իշխանություն, որի համար Արցախի հարցը փակ չէ։
Իմ շփման մեջ գտնվող հազարավոր արցախցիների հետ զրույցներից պարզ է դառնում, որ ընտրություններն իրենց համար առավել ևս որոշիչ են։ Նրանք սպասում են ընտրությունների արդյունքներին՝ իրենց ակտիվ մասնակցությամբ։
Արցախահայերն ակնկալում են, որ Հայաստանում կընտրվի այնպիսի իշխանություն, որը կկարողանա օժանդակել իրենց վերադարձի գործընթացներին և կապահովի նրանց արժանապատիվ կեցության պայմաններ մայր հայրենիքում՝ մինչև Արցախ վերադառնալը։ Նրանց ակնկալիքները ոչ թե շվայտ կյանքի մասին են, այլ միայն արժանապատիվ և աշխատանքով լի գոյություն։
Նրանք չեն մոռացել իրենց հայրենիքի մասին՝ թողնելով այնտեղ իրենց երեխաներին, ծնողներին, հարազատներին և սրբությունները։
Ես նաև ցանկանում եմ ընդգծել, որ արցախահայերը լավ գիտեն խաղաղության գինը և չեն հավատում այն թեզին, թե՝ «եթե մենք չընտրվենք, պատերազմ կլինի»։ Նրանց կարծիքով՝ խաղաղության հասնում են ոչ թե մուրալով, այլ արժանապատվությամբ և ուժեղ կամք ցուցաբերելով։
Հիշեցնենք, որ Հայաստանում խորհրդարանական ընտրություններն են նախատեսված հունիսի 7-ին։
ՀՀ ներքին գործերի նախարարության տվյալներով՝ 2023 թվականից մինչև այս տարվա փետրվարի 5-ը Հայաստանի քաղաքացիություն է ստացել 20 769 արցախահայ։ Այս ընթացքում ստացվել է 26 099 դիմում, գրանցվել է աճ, և ավելի քան 9000 երեխա նույնպես ստացել է հայկական անձնագիր։
