Իշխանությունն ամենից մեծ թշնամին է խաղաղության

Այսօր Աշտարակում «Հայաստան» դաշինքի հետ հանդիպման ժամանակ քաղաքացիներից մեկը հարցրեց Ռոբերտ Քոչարյանին Հայաստան-Ռուսաստանի Դաշնություն հարաբերությունների և «Խաղաղության պայմանագրի» մասին։

Ի պատասխան այդ հարցին՝ Ռոբերտ Քոչարյանը նշեց, որ այս իշխանության օրոք խաղաղություն երբեք չի լինելու։ Նրա խոսքով՝ «Այս իշխանությունն ամենից մեծ թշնամին է խաղաղության»։

Քոչարյանը բացատրեց, որ այս իշխանությունները 2018 թվականից ի վեր հարաբերություններում լարվածություն են մտցրել ՌԴ-ի հետ։ Նա նշեց, որ սկզբում դա անհասկանալի էր, բայց հետո դարձավ պարզ՝ իշխանությունները փորձում էին հեռանալ հայ-ռուսական ձևավորված դաշնակցային հարաբերություններից և փորձել աշխարհաքաղաքական վեկտորը շրջել։

«Բոլորդ մտածեցիք դեպի Եվրոպա՞, ո՛չ, շրջել դեպի Թուրքիա։ Եվրոպան մեր հարաբերություններում ներկայացված է լինելու Թուրքիայի միջոցով։ Եվ սրա համար պետք է ժողովրդի մոտ ձևավորել բացասական վերաբերմունք Ռուսաստանի նկատմամբ»,- բացատրեց նա։

Քոչարյանը նաև անդրադարձավ հասարակության մեջ Ռուսաստանի նկատմամբ հասկանալի վստահության կորստի հարցին։ Նրա խոսքով՝ այս իշխանությունները փորձում են «թունավորել» ժողովրդին՝ պնդելով, թե ռուսական զորքերը Ղարաբաղում էին և չկարողացան պահել այն։

«Սա իսկապես ստեղծում է մի վիճակ, որ հայ ժողովուրդը, որը մշտապես լավ վերաբերմունք ուներ Ռուսաստանի նկատմամբ, այդ հարցը ինքն իրեն տալիս է, և այս իշխանությունը փորձում է ուղղակիորեն թունավորել մեր ժողովուրդին, որ ռուսներն այդ պարտավորությունն ունեին և չկատարեցին, և դրա պատճառով կորցրեցինք Արցախը»,- ասաց նա՝ նշելով, որ այս մեղադրությունը հակասում է Հայաստանի անվտանգության հայեցակարգին։

Քոչարյանը նաև բացատրեց, թե ինչպես է աշխատում խաղաղության պայմանագրի մոդելը։ Նրա խոսքով՝ կոնֆլիկտների լուծման երկու հիմնական մոդել կա։ Մեկը, երբ ՄԱԿ-ի անվտանգության խորհուրդը որոշում է կայացնում պարտադրել խաղաղությունը՝ մտցնելով զորք և անջատելով կողմերին։ Երկրորդը՝ երբ կողմերին համոզում են, որ դա պետք է անեն, և կողմերի համաձայնությամբ տեղադրվում են խաղաղապահ ուժերը։

«Այն, ինչ կատարվեց 20 թվականին Ղարաբաղում, դա հենց այս մոդելն է։ Հայտարարության տակ ստորագրել է և՛ Ադրբեջանը, և՛ Հայաստանը, և՛ ՌԴ նախագահը։ Եվ Ղարաբաղի կարգավիճակն այդտեղ չէր քննարկվում, համարվում էր, որ հետագայում այդ հարցը պետք է քննարկվեր։ Հիմա այդ մոդելը ևս աշխատող մոդել էր, եթե Հայաստանը մեկ տարի, երկու տարի անց Պրահայում կոպիտ ասած չթռներ այդ մոդելից։ Հայաստան ուղղակի թռել է այդ մոդելից, և ամբողջ այդ կոնստրուկցիան, որը այդ զինադադարը, այդ խաղաղությունը պահում էր, փլուզել է»,- եզրափակեց նա։