Արշակ սրբազանի կալանքը երկարաձգելու վերաբերյալ միջնորդության քննության ընթացքում նրա պաշտպաններից մեկը՝ Արսեն Բաբայանը, լրագրողների հետ զրույցում անդրադարձել է գործի մի քանի կարևոր կետերի։
Նրա խոսքով՝ մեղադրող կողմը իր որոշման մեջ նկարագրել է այնպիսի գործողություն, որը, իբր, Արշակ սրբազանը կատարել է, սակայն այդ գործողությունը ոչ մի կերպ չի կապվում թմրամիջոցների իրացման հետ։ Ըստ պաշտպանի՝ եթե նման գործողություն տեղի ունենար, նույնիսկ այդ դեպքում էլ հնարավոր չէր լինի Արշակ սրբազանին մեղադրել առաջադրված հոդվածով։
Բաբայանը նաև անդրադարձել է դատական գործընթացի անսովոր ընթացքին։ Նրա խոսքով՝ կալանքի միջնորդությունը մի քանի անգամ փոխել է իր դատական նստավայրը՝ փորձելով հասնել դատավոր Մասիս Մելքոնյանին, որին պաշտպանները բնորոշում են որպես «շատ օբյեկտիվ»։ Երբ միջնորդությունը հասել է Կենտրոնի նստավայրին՝ դատավոր Կարեն Ֆարխոյանի նախագահությամբ, պաշտպանը հեգնաբար նշել է, որ «հավատում են», որ Կարեն Ֆարխոյանը կիրականացնի «արդարադատություն» և Արշակ սրբազանը կազատվի։
Հիշեցնենք, որ Արշակ սրբազանին առաջադրված մեղադրանքը վերաբերում է 2018 թվականին «Նոր Հայաստան, նոր Հայրապետ» շարժման մասնակիցներից մեկին վարկաբեկելու նպատակով ակցիայի մասնակիցներից մեկի պայուսակում թմրամիջոց գցելու հրահանգի։ Ավելի վաղ հրապարակվել էր, որ գործի միակ իրեղեն ապացույցը՝ մարիխուանայի գլանակը, կորել է։
